पंढरपूर : ‘शिवाजी जन्मावा, पण तो शेजारच्या घरात’ ही वृत्ती सर्वसाधारणपणे समाजात दिसते. हाच विचार लष्करातील नोकरीबाबतही अनेकदा दिसतो. पंढरपूर तालुक्यातील पांढरेवाडी येथील एक आजीबाई मात्र या गोष्टीला अपवाद ठरल्या आहेत. त्यांनी आपल्या नातवाला लष्करात पाठवण्याचे स्वप्न उराशी बाळगले आहे. आणि नुसते स्वप्न पाहून त्या थांबलेल्या नाहीत, तर त्याला सैनिकी शाळेत पाठवून त्याची तयारी करून घेण्यासाठी त्या स्वतः कष्ट करत आहेत.
टीव्ही किंवा चित्रपटातील वाटेल असेच काहीसे दृश्य अनेकदा पांढरेवाडी ग्रामस्थांना पाहायला मिळते. तसेच ते दोन दिवसांपूर्वीही पाहायला मिळाले. पावसाने सर्वत्र दलदल झाली होती. सकाळची वेळ असल्याने घराघरांत कामाची गडबड.... जनावरांच्या धारा काढण्याची घाई... मुलांना शाळेत पाठवण्याची गडबड... शेतकऱ्यांची न्याहरी चाललेली... सगळे आपापल्या कामात व्यग्र होते. अशातच चंद्रभागा वगरे नावाच्या आजीबाई आपला नातू रोहन याला खांद्यावर घेऊन निघाल्या होत्या.
रोहन सध्या पहिलीच्या वर्गात शिकतो आहे. शाळेची एकही पायरी न चढलेल्या या आजीबाईंनी आपला नातू सैन्यात भरती होईल, असे स्वप्न पाहिले आहे. त्यासाठी त्यांनी रोहनला सैनिकी शाळेतच पाठवण्याचा हट्ट घरच्या लोकांकडे धरला. त्यांचा तो हट्ट सर्वांनी मान्य केला. आणि तिथपासून त्यांची स्वतःचीही परीक्षा सुरू झाली.
त्या रोहनला वेळेत शाळेत सोडतात. तो घरी आल्यावर अभ्यासाला बसवतात. शाळेत दिल्या जाणाऱ्या भरतीपूर्व प्रशिक्षणाचा सराव घरी करून घेतात. त्यांचे कुटुंब शेती करणारे आहे. त्यामुळे त्यांचे वास्तव्य शेतातच असते. सध्या पावसाळ्यामुळे त्यांना अनेक अडचणींचा सामना करावा लागत आहे. रस्त्यावर चिखल व पाणी साठल्यामुळे या आजीबाई रोहनचे शूज खराब होऊ नयेत म्हणून एका हातात त्याचे दप्तर घेऊन, त्याला पक्क्या रस्त्यापर्यंत चक्क खांद्यावरून घेऊन जातात. उद्या आपला नातू आपले स्वप्न पूर्ण करील, अशी त्यांना आशा आहे. खेडेगावातील अशा या देशभक्त चंद्रभागा आजीला सॅल्यूट करायला हवा.
